UP-a Muzaffarnagar district-a rel chesualah mi 22 an thi

0
433
views

Uttar Pradesh-a Muzaffarnagar district-a rel chesualah mi 22 an thi a, state police hotu, Additional Director General, Anand Kumar-a sawi danin, he thil thlengah hian mi firfiak pawlte an inrawlh em tih finfiahna engmah a la awm lo. Inrinni tlai dar 5:45 vel khan Delhi atanga km 100 vela hla, Khatuli-ah Puri-Haridwar Utkal Express rel chu a kawng a zawh sual avangin a chesual a, rel pindan 13 a let a, mi 156 an hliam a ni. Rel chetsual chhan hi hriat la ni lo mah se, a hmuna awmte chuan rel hnathawkte inthlahdah vang niin an sawi a, he thil thleng avang hian rel hotu 8 chu hrem an ni tawh a, sorkara Secretary tlukpui, Railway Board member pakhat, Senior Divisional Engineer, Assistant Engineer, Senior Section Engineer leh Junior Engineer chu chawlh lailawktir an nih bakah, Northern Railway Chief Track Engineer chu sawn nghal a ni bawk. Railways engineer-te chuan Khatauli rel station thuneitute chu rel kawng an siam tha mek tih leh, an zawh fel hma chu rel tlantir lo tura ngen an ni tih an sawi a, he thilah hian FIR thehluh a ni tawh a ni. Railways chuan mitthi chhungte hi zangnadawmna, cheng 3,50,000 theuh, hliam na zualte cheng 25,000 theuh pek an nih tur thu a puang a ni. He chetsualna avanga he rel kawng khar chu tukin khan hawn a ni leh tawh tih Northern Railways hotuten an sawi.