Australia High Court-in mahni anpuite neih phalna dan siam chungchangah mipui ngaihdan lakna neih a remti

0
741
views

Australia rama mahni anpuite neih phalna dan siam chungchanga mipui vote lakna tur khin letna thubuaiah thutlukna siam a ni ta a, Australia High Court chuan mipui ngaihdan lakna hi neih a remtih thu a puang. Puan tawh angin, Australia sorkar chuan mahni anpui neih chungchangah hian mipui ngaihdan lak a tum a, PM, Malcolm Turnbull chuan mipui ngaihdan hian kum tawp lama hemi chungchang, Parliament-a put luh tur pawh a nghawng thei dawn niin a sawi a, mahni anpui neih thlawptuten nasa takin tan la mah se, court-in a remtih loh chuan mipui vote lak tumna hi thulh tur a ni. Hemi chungchangah hian Australia rama court sang ber-ah hian thu pahnih a lut a, mipui ngaihdan lak duh lotute chuan sorkar thil tum hi Parliament-ah pawm hmasak a nih loh avangin kal tlangpui theih a ni lo nia an sawi bakah, hemi buaipui tur hian Australian Bureau of Statistics chuan thuneihna a nei lo niin an sawi a, court chuan mipui ngaihdan lakna neih dodaltute tan chhan hi a pawm ta lo a ni. PM, Turnbull-a chuan he thil pawimawh taka ngaihdan laknaah hian Australia mipui zawng zawng tel turin ngen a, kar leh Thawhlehni atanga October ni 27 thleng, vote thlakna hun hi hawn a ni ang a, November ni 15-ah result puan a ni ang.