US-a state 15-in President Trump lakah thubuai thehlut

0
777
views

US-a state 15 inthurual chuan an ramin raltlante chhawmdawlna a pek thin tihtawp a nih avangin President, Donald Trump-a kaihhruai sorkar lakah thubuai an thehlut. Thawhlehni kal ta khan US sorkar chuan Barack Obama kaihhruai sorkarin a hawn, Deferred Action for Childhood Arrivals (DACA) program chu tihtawp a nih thu a puang a, DACA hnuaiah hian US-a kum tling lo raltlante chu kum hnih chhung, an rama thawn let loh theih an nih bakah, hnathawh phalna pek theih an ni a, kumin chhungin DACA hnuaiah hian mi 8,00,000 ziah luh an ni tawh a ni. DACA tihtawp a nih avang hian US state hrang hrang ukilte chuan New York Federeal Court-ah thubuai an thehlut a, he thutlukna hi Mexico mite huatna leh en hranna nia an hriat thu leh, mihring mihrinna zah lohna leh nunrawnthlak nia an ngaih thu te, DACA hnuaia ziah luhte chu dan zawm tha leh chhiah chawi tha tak tak, US chu an ram ai pawha an chenna ngheta ngai zawkte pawh an nih thu, New York Attorney General, Eric Schneiderman chuan a sawi a ni. DACA titawp tur hian hian Texas leh state dang 10 chuan court-ah kum 2015 khan khatih laia President, Barack Obama kaihhruai sorkar lakah thubuai an lo thehlut tawh a, President Trump-a’n DACA a tihtawp avang hian nimin khan an thubuai hi an hnuk kir a ni.