Austria inthlanpuiah Conservative People’s Party chak dawn

Austria rama Conservative People’s Party chu inthlanpuiah an chak dawn nia sawi a ni a, an hruaitu hi kum 31 mi chauh, Sebastian Kurz a ni a, khawvela ram hruaitu naupang ber a ni thei dawna ngaih a ni. People’s Party hian vote zaa 31 a hmu ngei dawn a, anmahni-a sorkar an siam theih loh pawhin pawl dang an thawhpui ang a, Freedom Party an thawhpui rin a ni. He inthlan hma hian Kurz-a hi Europe khawmualpuia Foreign Minister naupang ber a ni tawh a, kum 2013 khan, kum 27 mi a nih laiin Foreign Minister a ni a, kumin May thla khan People’s Party hruaitu atan thlan a ni. France President, Emmanuel Macron leh Canada PM, Justin Trudeau te nen ram hruaitu naupang ber ber an ni dawn a ni.