Barcelona khawpuiah motorin mi 13 chil hlum

0
668
views

Spain ram hmar chhak lama Catalonia khawpui, Barcelona laili-ah Muslim mi firfiak nia rinhlelh, tu tih hriat lohin motor-in mi 13 a chil hlum a, he thil thlen atanga darkar 8 velah, Barcelona chhim lam atanga km 120 hla, Cambrils khuaah car pakhatin mi kawng kal lai a sut avangin civil mi 6 leh police officer pakhat an hliam bawk a, police-ten vawiin khan he pawi khawihnaa inhnamhnawiha rinhlelh, mi firfiak 5 an kap hlum tawh niin an sawi a, Barcelona leh Cambrils-a thil thleng hi a inzawm niin an sawi bawk. Barcelona-a Las Ramblas kawngpui dunga Van hmanga mi chil hlumtu hi police-te chuan ngawrh takin an zawng nghal a, mi pahnih an hreng tawh a, Van khalhtu hi ke-in a tlanchhia tih an hre tawh a, amah hi kum 18 mi, Moussa Oubakir niin an sawi bawk a, tuna an man tawhte zingah hi chuan a la tel lo a ni. Las Ramblas-a pawi khawihnaah hian mi 100 chuang an hliam a, thi leh hliam zingah hian ram dang mi engemaw zat an tel a, France sorkar chuan hliamte zingah hian an ram mi 26 an tel niin a sawi a, an zinga 11 phei chu an na hle niin a sawi. Germany ram mi pawh 13 an hliam nia hriat a ni a, Ireland naupang kum 5 mi pawh a ke a tliak bawk a, Hong Kong, Taiwan, Greece, Pakistan, Philippines, Venezuela, Australia, Romania, Peru, Netherlands, Denmark, Algeria leh China mite pawh an hliam nia thu dawn a ni.

Las Ramblas-a pawi khawihna hi Spain ram sanaa nimin tlai dar 5 vela thleng kha a ni a, Cambrils-a pawi khawihna hi chu tukin dar 1 vela thleng a ni thung a, Nilaini zan khan Catalonia biala Barcelona chhim lam atanga km 200 vela hla, Alcanar khuaa chenna in pakhatah thil a puak a, mi pakhat a thi a, mi dang paruk an hliam bawk a ni. Police-te chuan hei hi gas put avanga thleng niin an sawi a, mi thenkhat erawh chuan pawi khawihna a nih an ring a, Barcelona leh Cambrils-a thil nen hian a inzawm an ring bawk a ni. Islamic State mi firfiak pawl thuthar thehdarhtu, Amaq news agency chuan Barcelona-a pawi khawihtute chu IS mi firfiakte nia sawiin, an pawl kohna chhangin US thurualpui ramte lakah beihpui an thlak niin a sawi a, IS thil tih a ni ngei a nih chuan thla 13 kal ta chhunga Europe-a motor hmanga pawi an khawih tum sarihna a ni dawn a ni. US President, Donald Trump-a chuan pawi khawihtute hi na taka demin, Spain ram pui turin US chu a inpeih reng tih a sawi a, France President, Emmanuel Macron-a pawhin thi leh hliamte a tuarpui thu a sawi a, Spain PM, Mariano Rajoy-a chuan he thil thleng hi ramin a tuar hle tih sawiin, thi tate hi ni thum chhung sun an nih tur thu a sawi