Bengaluru chanchinbumi, Gauri Lankesh, a chenna in kawtah kahhlum a ni

0
304
views

Bengaluru-a chanchinbu mi, Gauri Lankesh-i chu a chenna in kawtah tu tih hriat lohte’n an kap hlum. State CM, Siddaramaiah chuan he thil thleng hi Special Investigation Team-in a chhui chian tur thu a sawi a, Union Home Minister, Rajnath Singh-a pawhin he thil thlen dan hi a ngaichang mek a ni. Police-te sawi danin, kum 55 mi, Pi Lankesh-i hian nizan dar 7 vel khan a pisa a chhuahsan a, dar 7:45 velah in a thleng a, in chhunga a lut tur chu mi pathumin lo ko pengin, an kah rawn ta a, CCTV atanga a lan danin, mi pakhat, kawr dum ha-in Pi Gauri-i hi pan hnaiin a kap a, he pa hian hun eng emaw chen chu a lo nghak a ni. Police officer-te nena an thutkhawm hnuah, Pu Siddaramaiah-a chuan thuthar lakhawmtute hnenah IGP kaihhruai, SIT-in hemi chungchang hi a chhui dawn tih a sawi a, inthahna thleng hi ruahman lawk a nih an rin avangin DGP hnenah pawh a chhui turin police officer a tam thei ang ber ruat turin a hriattir nghal niin a sawi. Pi Gauri-i chenna inah hian CCTV pali vuah a ni tih sawiin, hei hi police-te chuan an chhawr tangkai hle dawn niin a sawi bawk. Pu Rajnath Singh-a chuan Union Home Secretary, Rajiv Gauba-a chu state sorkar hnen atanga thil thlen dan report la turin hriattir tawh tih Union Home Ministry chuan a sawi a ni.

Pi Gauri Lankesh-i hi mi huaisen, tawng huai leh dikna ngaisangtu a ni a, kar tin chhuak chanchinbu, ‘ Gauri Lankesh Patrike’ Editor hlui a nih bakah chanchinbu dang eng emaw zat a enkawl bawk a, chanchinbu-ah politics leh chi inthliarna chungchanga a ngaihdan huai takin a ziak thin a, Hindu lalna rama India ram siam tumna, Hindutva sawiseltu langsar berte zinga mi a ni bawk. Nikum November thla khan Pi Gauri-i hi kum 2008-a a thu ziah avangin intih mualpho tumna thubuaiah thiam loh chantir a lo ni tawh a, thla ruk lung in tang tur leh pawisa chawi tura tih a ni a, mahse court-in thupek a siam ni-ah hian bail-a chhuah a ni.