Bihar-a Congress MLA 27 zinga 19-in Rashtriya Janata Dal nena an thawh dunna chhu chat turin an party Vice President, Rahul Gandhi an ngen. Times of India sawi danin, heng Congress MLA-te hian engemaw chen tal, RJD thawhpui loh an duh thu an sawi a, RJD hruaitu, Pu Lalu-a chu Congress tan a rinawm ngai lo tih leh, hnam hnufual chauh a duhsak bakah Muslim leh Yadav hnamte tamna bial chu a party tan a hauh tlat thute sawiin, hengte avang hian Congress hi Bihar-ah hian kum 20 vel a che tha tawh lo niin an sawi a ni. Bhagalpur bialtu, Congress MLA Ajit Sharma-a chuan he state-ah hian Congress-in RJD puihna a mamawh rih lo tih an party Vice President hi a hrilh niin a sawi a, a tul chuan kum 2019-a Lok Sabha inthlanpui hmain BJP an hneh theih nan RJD hi an thurualpui leh thei tho nia sawiin, tunah hi chuan RJD thawhpui hi fuh lo niin a sawi a ni. Bihar-a Congress MLA te hi an phel mai dawn nia hriat a ni a, an President, Ashok Chaudhary chuan AICC hruaitu thenkhat chu state Congress unit President a nihna atanga paihthlak tumah a puh a, tih tur dang neia insawiin, Rahul Gandhi-a hova thutkhawmna ah pawh hian a tel lo a, an President, Sonia Gandhi leh vice-president, Rahul Gandhi chu a la titipui thuai tur thu a sawi. Ashok Chaudhary hi Congress MLA 14 leh MLC 4-in an thlawp nia hriat a ni a, JD (U) zawm an rilruk nia sawi a ni bawk. Congress MLA-te hian JD(U) an zawm chuan, an zinga 8 vel chu Minister an nih theih rin a ni. Congress thupuangtu, Premchandra Mishra erawh chuan JD (U) chu an party tihphel tumah puhin, an hlawhtling lo niin a sawi. Congress thuneitu sang, party High Command chuan Bihar-a an party President, Ashok Chowdhary hi party tihphel tuma phiar ru-ah puhin, paih an tum fel tawh nia hriat a ni a, an thu tlukna erawh chu puan a la ni lo.
Chanchin Thar Bihar-a Congress MLA 19-in RJD nena an thawh dunna chhu chat turin...
