Sirsa-a Dera Sacha Sauda hmunpui sipaiten luh khung

0
296
views

Haryana-a Gurmeet Ram Rahim Singh-a kaihhruai, sakaw pawl pakhat, Dera Sacha Sauda hmunpui, Sirsa-a mi chu vawiin khan sipaiten an luh khung a, hemi hma hian buaina a chhuah loh nan he khuaah hian curfew an puang hmasa a ni. He pawl hmunpui chhunga an thil hmuhte zingah chuan tangka note lem, plastic-a siam pawh a tel a, tangka tam tak an hmuh bakah computer hmanruate an man bawk. He an hmunpui chhungah hian ruhro pawh an hmu nual a, a daptute hi paramilitary force company 41, sipai column 4, district 4 Police leh SWAT team pakhat, ui fing leh bomb sut thiamte an ni a, video thla latu 50 leh tala hawng thiam engemawzat an hruai bawk. He pawl hmunpui hi pahnih – ram acre 600 a zau leh acre 100-a zau a ni a, a chhungah hian an hotupa nuamsa taka a awmna hmanraw hrang hrangte, damdawi in, stadium, zirna in, bazar leh thil dang tam tak a awm a, puk ang deuh pakhat, Ram Rahim-a awmna thin phei chu tuma luh phal lohna hmun a ni a, hei hi hmeichhiate pawh a pawngsualna thin niin an sawi. He puk pawh hi sipaite chuan an dap vek a ni. Puan tawh angin tun hnaiah he hung chhung atang hian ralthuam chi hrang hrang engemawzat man a ni a, Gurmeet Ram Rahim Singh-a hi a pawlte zinga hmeichhe pahnih pawngsual thubuaiah thiam loh chantir a nih hnuah, kum 20 tang turin lung inah dah a ni.