Bihar-a pawngsual tawk tan zangnadawmna nuai 10

Supreme Court-in Bihar-a hmeichhe pakhat, pawngsual tawk chu zangnadawmna, cheng nuai 10 pe turin state sorkar a hrilh. Hemi chungchang ngaihtuahtu, Justice Dipak Misra-a kaihhruai bench chuan he thupek hi a siam a, he hmeichhia, kum 35 mi, HIV hrik pai hi Patna-a pawngsual a nih hnuah nau a pai a, tunah hian a nau pai hi chawlhkar 26 a ni tawh a, a nau pai hi chawlhkar 17 a nih lai khan tihtlâk tumin Patna Medical College and Hospital a pan nia hriat a ni. Supreme Court chuan tunah chuan a nau pai hi a hràm deuh tawh avangin damdawi thiamte ngaihdanah pawh tihtlâk chi a ni tawh lo tih sawiin, a him laia harsatna a tawh avangin he hmeichhia hi zangnadawmna pek tur a ni, a ti a, Medical Termination of Pregnancy Act, 1971 hnuaiah nau pai, chawlhkar 20 tling tawh chu tihtlâk loh tur a ni a, he hmeichhe ukil hian, a him lai khan sorkar damdawi inah an tihtlâksak duh loh avangin, he hmeichhia hian nau hi a pai ta zel tih sawiin, sorkarin zangnadawmna a pe tur a ni, tiin court sang berah hian a thlen a ni. He hmeichhia hi mi chanhai leh chenna mumal pawh nei lo, mi rethei tak a ni a, nau a pai tih pawh hi chawlhkar 13-na velah, hmeichhe chanhaite chhawmdawltuten an chhanchhuah hnuah a hre chauh niin a sawi.