BJP MLA Kuldeep Sengar-a’n a pawngsual nia sawi hmeichhe tleirawl pakhat leh a chhungte chuan vauna nasa tak an tawk a, uluk taka venhim ngai an ni tih CBI in Special Court a hrilh.

0
429
views

Special Court hian Uttar Pradesh sorkar chu he hmeichhe tleirawl hi ama chenna inah let se’ng a tan a him tawk em tih report thehlut turin a hriattir nghal a, he hmeichhe naupang hi a chuanna car July thlaa motor pakhatin na taka a sut avanga a hliam tawrh enkawlin New Delhi ah a la awm chhunzawm ta zel a, a chhungte chuan he tleirawl chuanna car na taka motor dangin a sut hi amah thah tumna a ni tih an sawi avangin he thil thleng hi CBI te chuan an chhui zui mek a ni.

CBI chuan tleirawl hi venhimna uluk bik pek a ngai tih Court an hrilh a, Judge Dharmesh Sharma chuan UP sorkar chu he tleirawl leh a nu, a unaunu leh a unaupa te chu Uttar Pradesh-a let tir leh an tan a him em tih hapta khat chhunga hriattir turin thu a pe a ni.

He hmeichhe tleirawl chuanna car hi Raebareli bulah July ni 28 khan truck pakhatin na takin a su a, a nutei te pahnih chu an thi a, amah hi Delhi AIIMS Hospital ah enkawl zui a ni. Tun thla tir lam khan hmeichhe tleirawl awmna Hospital ah hian Judge hian kal chilhin a pualin court a hawn sak a, a thusawite a ngaithla a ni.

August ni khat khan Supreme Court chuan Unnao case kaihhnawih thubuai 5 te chu Delhi a ngaihtuah turin a sawn a, nitina thubuai ngaihtuahtu tur judge ruatin, ni 45 chhunga rel fel turin a ti a a, central sorkar chu tleirawl leh a chhungte venhimna pe turin a ti bawk.

Pawngsualtua puh Kuldeep Sengar hi BJP MLA, term 4 thlan tlin lo ni tawh a ni a, nikum April thla a\ang khan Jail ah a tang tawh a, tlerawl hian kum 2017 khan a pawngsual tih a sawi a ni.