Blue Whale Game vanga intihhlum tum police-in chhan hman

Puducherry-ah Blue Whale Game khel nia rinhlelh, hmeichhia kum 21 mi chu a intihhlum hmain police-in an chhan hman a, police-te sawi danin, nimin khan he hmeichhia hi vaukam bula kawngah amah chauhin a kal a, a ban rekah inzaina hnu hma hmuh tur a awm bawk a, hetia pawna a chhuah hma hian ni engemawt, inah a inkhung a ni. He hmeichhia hi a thianten Inrinni zan khan a haw lo tih WhatsApp group pakhat hmanga police-te an hrilh hnuah police-te chuan an zawng nghal niin DGP, SK Gautam-a chuan a sawi a, he nula, bank-a thawk hian internet-a khelh chi, mahni intihlum tura mi fuih thin, Blue Whale Game a khel ngei nia an hriat thu sawiin, an va hmuh chuan ni thum chhungin vawi 10 vel a inzai tawh tih inziahna lehkha a lo kawl tih a sawi a ni. Puan tawh angin, Blue Whale Game avang hian khawvel ram hrang hrangah tleirawl leh thalai engemaw zat an intihlum tawh nia hriat a ni a, ram chhungah pawh mi 3 vel an intihlum tawh nia hriat a ni a, Delhi High Court chuan Blue Whale Game theh darhna tawh phawt chu paih turin internet-a company lian – Google leh Facebook pawh a lo ngen tawh a ni. Inrinni zan khan Madhya Pradesh-a Damoh khuaah pawl 11 zirlai pakhat chu rel hmaah dingin a inchil hlumtir a, he tleirawl hian Blue Whale Game a khel thin niin a thiante chuan an sawi a, an thian ho zingah chuan a khel hmasa ber niin a sawi. Tukin khan a ruang hi rel kawngah hmuh a ni a, relin a chil hlum hma khan amah leh amah thla a inlak niin police-te chuan an sawi bawk.