Canada-ah mi firfiak nia hriatin police su lui, chemin bei zui

0
419
views

Canada rama khawpui pakhat, Edmonton-ah vawiin khan mi pakhatin a motor khalh lai hmangin police pakhat a su lui a, chem nen a bei zui bawk. Thuneitute chuan he inbeihnaa hliam ve, midang pali leh police hi damdawi inah enkawl mek an nih thu leh an ngaihtuahawm lutuk lo tih an sawi. Police beih tawk hi a motor bula a din laiin, truck te chi, chak tak lo tlan-in a motor hi a rawn sut avangin, ft 15 vela thuiah a lêng a, a sutu hi truck a\anga lo chhukin, chemte-in vawi eng emaw zat a vit zui a, ke-in a tlanchhe zui ta a ni. Thuneitute chuan he thil thlen hma lawk hian lirthei kal vel an endikna-ah mi pakhat, truck te chi khalh chu an lo tihdin thu leh, tlanchhiat a tum avangin an um zui tih an sawi a, an umna lamah hian kawng kal mi eng emaw zat a su lui tih an sawi bawk. He truck khalhtu hi a hmel leh hming an hriat thu leh tun hma pawha a firfiaka chetna kawnga inhnamhnawiha an rinhlelh tawh thu te, an la zawn mek thu leh rinhlelh thil-ah Somali raltlan, mi pakhat an hreng mek tih an sawi bawk a ni.