CBI-in Karti Chidambaram thu zawtfiah

0
446
views

Central Bureau of Investigation-in sumdawng hausa, Peter Mukherjea-a leh a nupui, Indrani Mukherjea-i te company, INX Media hnen atanga thamna sum laa puh, Union Minister hlui, P Chidambaram-a fapa, Karti Chidambaram-a chu nimin khan thu zawhfiah atan a ko a, Karti-a hian nimin chawhma dar 11:30 vel khan New Delhi-a CBI pisapui a thleng a, tlai dar 6:30 thleng thu zawhfiah a ni. Thuhretute sawi danin, CBI hian Karti-a thurualpui nia rinhlelh, Bhaskar Raman, Ravi Vishwanathan leh Mohanan Rakesh te pawh thu a zawtfiah nghal a, an pali hian a hran theuha kawm niin, an thusawi te chu ngun taka chhui chian a, endik a nih hnuah, thu zawhfiah atana koh nawn an ngaih dawn leh dawn loh a hriat dawn ni a sawi a ni. Puan tawh angin, CBI hian P Chidambaram-a Union Finance Minister a nih lai khan INX Media-in Mauritius ram atanga pawisa a dawn theih nana ram sorkar hnuaia pawl pakhat, Foreign Investment Promotion Board-in phalna a pek chungchang a chhui mek a, thuhretute chuan Karti-a’n midang hminga a enkawl, company chuan INX Media hnen atangin thamna a la niin an sawi a, kar hmasa Nilaini khan Karti-a hi CBI hian thu a lo zawtfiah tawh a ni. Union Minister hlui, Pu Chidambaram-a chuan a fapa laka FIR thehluh leh CBI-in thu zawhfiah atana a koh chungchangah hian thil dik lo awm niin a sawi a, sorkar chuan CBI leh pawl dangte hmangin Karti-a hi a bei niin a sawi a, hetih rual hian FIPB chuan company eng emaw zat hnenah phalna a pe ni a sawiin, he thilah dan bawhchhiatna thleng a awm lo niin a sawi a ni.