Kerala-a Cochin lawngchawlhhmunah tuialhthei phur ONGC lawng lian a puah vangin mi panga an thi a, midang sawm an hliam. Thuneitute chuan he lawng lian, Sagar Bhushan tia vuah hi lawngchawlh hmunah hian enfiah tura chawl a ni tih an sawi a, vawiin hi state chawlh a nih vangin, thite pawh hi contract leh nitin inhlawha hnathawkte an ni tih an sawi. Kochi Police hotu, MP Dinesh chuan thi zingah hian meikhu hâk vanga thite pawh an awm tih a sawi a, lawng chhunga tang, mahni insaseng thei lo mi 11 an chhanchhuak tawh tih leh midang tang an awm leh awm loh an la enfiah mek tih a sawi bawk. Chhiatna thleng hi pawi a tih thu, Union Transport Minister, Nitin Gadkari chuan a sawi a, thi chhungte a tawrhpui thu leh he chhiatna thlen dan hi kimchang taka chhui chhuah a nih tur thu a sawi.
Chanchin Thar Cochin-ah tuialhthei phur lawng puak, mi panga thi
