Comptroller & Auditor General thar atan Rajiv Mehrishi ruat

Union Home Secretary chawl ta, Rajiv Mehrishi chu Comptroller & Auditor General thar atan ruat a ni a, Information and Broadcasting Secretary, Sunil Arora chu Election Commissioner atan ruat a ni bawk. Nimin khan sorkar laipui chuan Secretary leh Additional Secretary thar 17 a ruat a ni. Rajiv Mehrishi hi Home Secy. a nihna atanga a pension hnu, darkar tlem te-ah CAG thar atan hian ruat a ni a, tuna CAG, Shashi Kant Sharma hi tun thla ni 24-ah a chawl dawn a ni. Kum 1978-batch Rajasthan cadre IAS officer, Rajiv Mehrishi hi a vannei hle a, Finance Secretary atanga a pension dawn chiahah Home Secretary atana ruat a nih avangin kum hnih a thawk zui a, tunah hian Home Secretary hna a chawlhsan rualin CAG atan ruat a ni leh a, he hna hi kum thum a chelh ang. Rajasthan cadre IAS officer bawk, Sunil Arora hian Nirvachan Sadan-a Election Commissioner hna ruak pakhat chu a luah dawn a, Chief Election Commissioner, A K Joti leh Election Commissioner dang, O P Rawat-a nen, Election Commissioner ruat kim an ni ta a ni. Election Commission hian Delhi Assembly-a AAP MLA 20, hlawkna keng tel hna dang thawka puh an nihna thubuai an ngaihtuah a ngai dawn a ni.