US hian thlawhna pahnih hmangin a khua leh tui te hi a hruai chhuak a, Tokyo Haneda Airport a\angin US lam an pan a ni. He Lawng lianah hian US mi 400 vel an chuang a, lawng chhunga chuang tam takin coronavirus an kai avangin tun thla ni 3 a\ang tawh khan Lawng hi Japan lawng chawlhna hmunah chhunga chuang mi 3,700 te nen hren a ni.
He lawng hi China ram pawn lama Coronavirus kai tamna ber a ni a, Japan sorkar thuneitute chuan lawnga chuangte zingah a tira virus kai 70 chu 355 ah an pung chho tawh tih an sawi a, US mi leh sa virus kai tawh mi 40 te chu Japan ah hian enkawl an ni dawn tih thuneitute chuan an sawi a, thlawhna pahnih hmanga US mi leh sa hruai chhuah te hi mi engzat chiah nge an nih puanzar a ni lo a ni.
Heng mi te hi US an thlenin ni 14 chhung khung hran an ni ang a, lawnga chuang \henkhat chuan hruai chhuah hi an duh lo thung a, lawng hi Nilaini thleng la hren tur a ni a, chumi chu nghah thlen mai an duh zawk thung a ni.
Ram dang, Israel, Hong Kong leh Canada te pawhin an mi te hruai chhuak turin ruahmanna an duang mek a, Australia chuan an ram mi 200 te hruai chhuak turin hma an la mek tih an sawi bawk.
Lawnga tang mekte tan hian Japan sorkar chuan iPhone 2000 a sem a, he phone hmang hian Japan sorkarin App pakhat a duan hmangin doctor thiam leh damdamdawi lam thiamte an berawn thei dawn a, rilru lama mithiam bikte pawh an rawn thei dawn a ni.
