Apple leh Google hian technologoy an duan tur hi apps chikhat, download tur chi a ni ang tih an sawi a, he apps hi mi tumah tihluihnaa hmantir tur an ni dawn lo a, a duh a piangte hman tura siam a ni ang a, a hmangtu hming leh a nihna te tarlan a ni lovang tih an sawi.
He Apps hmangtu chu a Smartphone bluetooth signal hmangin a vah velna leh midang bula a khawsak dan te chhinchhiah a ni ang a, Covid-19 kai bulah an lo awm emaw, an bulhnaia lo awm tawhte zingah hri leng kai thar an lo awm emaw a nih chuan phone hmangtu chuan inralrinna warning a dawng dawn a ni. He apps hian a hmangtu chenna hmun leh a mimal thil engmah a chhinchhiah sak dawn lova, a duh apiang tan a hman theih dawn a ni.
Hetihlai hian US President Donald Trump chuan sorkarin he technology siam tur hian ngaihtuahna hun an mamawh rih tih a sawi a, Apple leh Google thil siam tum chu a phurawm rualin mimal zalenna lamah mipui tam tak a ti mangang thei tih sawiin, mipui hman theiha tihchhuah hun tur chu chik taka an ngaihtuah hunah puan a ni ang tih a sawi.
