Campaign theih hun chhung chu zanin dar 6 khan a tawp a, an hun tlemte an neih, vawiin tlai thleng khan BJP chuan Delhi khawpuiah kawng zawhin ngawrh takin an campaign a, Amit Shah, JP Nadda, Smriti Irani, Anurag Thakur leh Manoj Tiwari te chuan roadshow buatsaihin mipui pungkhawm hmaah Delhi khawpui tuam chhuakin thu an sawi a ni. BJP campaign-naah hian The Great Khali pawh a inlan a ni.
AAP leh BJP chu CAA chungchangah a inbei nasa zual hle a, hnathawh tur nei lote hna pek chungchangah an in bei nasa hle bawk. Tun thla ni 8-a inthlanna neih turah BJP an vote nachhan tur mipuiten an hre duh tih AAP hruaitu, Delhi Chief Minister ni bawk, Arvind Kejrwal chuan sawiin Amit Shah chu mipuite zawhna chhang turin a cho a ni.
Hetihlai hian Election Commission chuan Arvind Kejriwal-a mi firfiak tia sawitu BJP MP Parvesh Verma-a chu darkar 24 chhung campaign thei lo turin a hrem a, kar kalta pawh khan Verma hi dengkhawng tak taka thusawi a chin vangin campaign thei lo turin darkar 96 hrem a lo ni tawh a ni.
