Doordarshan leh All India Radio-in Independence Day-a mipuite hnena thuchah a sawi tur an tichhuak duh lo – Tripura CM

0
410
views

Tripura CM, Manik Sarkar chuan nimin, Independence Day-a mipuite hnena thuchah a sawi tur chu Doordarshan leh All India Radio-in an tichhuak duh lo niin a sawi a, sorkar media hotute hian a thusawi tur chu siam tha leh turin an ti nia sawiin, an thil tih dan chu a duh loh thu a sawi a ni. Tripura CM lungawi loh chungchangah hian Doordarshan leh All India Radio enkawltu, Prasar Bharati chuan engmah a la sawi lo nia hriat a ni. Tripura sorkar sawi danin, CM thusawi tur hi Inrinni khan record a ni tawh a, Thawhtan zan khan Doordarshan leh AIR hotute chuan, CM thusawi hi siam that phawt a nih loh chuan tihchhuah a nih loh tur thu, CM office an hriattir ta a, CM thusawi hi ngun taka endik a nih hnuah, ram ni pawimawha Doordarshan leh All India Radio atanga tihchhuah a nih dawn chuan siam that phawt a ngai a, a siam that phawt chuan tihchhuah a nih tur thu an sawi niin a sawi. CM chuan hetiang hi a la tawn ngai loh thu sawiin, a thuchaha thumal pakhat pawh a tihdanglam loh tur thu a sawi avangin a thuchah hi tihchhuah a ni ta lo nia hriat a ni. CPI(M) General Secretary, Sitaram Yechury chuan Doordarshan chu BJP-RSS mimal thil a ni lo tih sawiin, eptu lam hruaitute thuchah chu tichhuak lo tura hrilhah PM chu a puh a, Doordarshan leh AIR thil tih dan chu mipui zah lohna nia a ngaih thu a sawi bawk.