Florida High School-a zirlai 17 kaphlumtu, Nikolas Cruz-a Police te hmaah inpuang

Florida High School zirlai 17 zet kaphlumtu kum 19 mi Nikolas Cruz chuan Police te hmaah a thil tih hi a puang tawh. Nikolas Cruz hian shool hi luh chilh zirlaite chu a pawng kah chiam a, a silai hnutchhiahin a tlan chhe zui ta a ni. Nikolas Cruz hi Court ah hruai a ni tawh a, a lakah hian tum lawk renga tualthah thubuai chi hrang hrang 17 ziah luh a ni. FBI chuan nikum lam tawhah khan a nungchang rilhlelhna an lo nei lawk tawh tih an nemnghet a, niminpiaha Marjory Stoneman Douglas High School Parkland, Florida-a zirlaite pawng kah chiamna hi kum 2012 hnua inpawng kahna thleng leh rapthlak ber a ni. Court lehkhapawimawh atanga a lan danin Cruz hian school hung chhung hi lutin a silai ken AR-15 hmangin school chhung leh a chhehvela a mihring hmuh apiangte a pawng kah chiam a, silaimu tam tawk tak a pai bawk a, hetianga rawng taka zirlaite a pawng kah hnu hian a silai leh a mu te chu hnutchhiahin a tlan chhe zui a, a hnu darkar khat velah Police te chuan an man zui a ni. Cruz hi he school-a lo kal tawh, a nungchang that loh vanga hnawh chhuah a ni a, a zirlaipuite chuan a nungchang avanga midang pawhin an kawm serh a nih thu leh silai atchilh tak a nih thu an sawi a, Social Media, Facebook leh Instagram lamah pawh silai kenga a thlalak chi hrang hrang a pholan hmuh tur a tam hle a ni. Youtube lama a comment pakhat a hmuh avanga ngaihtha lovin Utube hmangtu pakhat Ben Bennight chuan FBI te be pawpin a ngaihthat loh thu a lo hrilh tawh a, tuna rawng taka zirlaite a pawng kah takah hian FBI te chuan an rawn be pawp leh tih Bennight hian a sawi. FBI lam pawhin Bennight-a thusawi hi a dik tih an nemnghet a, you tube comment pawh hi an chhui zui nghal nia sawiin, khatih hunlai khan comment siamtu ber hi an hrefuh thei lo niin an sawi. School assistant football coach Aaron Feis chuan silaimu laka humhim tumin zirlaite awmna lamah zuangin a din hliah a, damdawiin thlenpui hnuah a hliam tuar lovin a thi a, a thawhpuite chuan a huaisenna hi ropui an tih thu an sawi. Athletic director Chris Hixon pawh thi zingah hian a tel a, zirtirtu Scott Beigel pawh naupangte chhanhim tuma kawngka khar a tum laiin kahhlum a ni bawk. Hetianga Nikolas Cruz a’n rawng taka zirlai 17 zet a kahhlumte hi kum 14 leh 18 mi inkar an ni hlawm. Nimin khan mi sang tam tak chu mitthite sun hian sathau khawnvar halin an pungkhawm a, silai khuahkhirhna dan khauh zawk siam an duh thu an au chhuahpui a ni.