Guam chungchangah North Korea in thutlukna la siam lo

0
529
views

Pacific tuifinriata US awp, Guam thliarkar lam hawia missile pali kah chungchangah North Korea hruaitu lu, Kim Kong Un-a chuan thutlukna siam a la tum lo a, US chet dan a ngaichang phawt dawn. North Korea sorkar chanchinbu, Korea News Central Agency sawi danin, nimin khan Workers’ Party of Korea Chairman, Kim Jong Un-a chuan Guam lam hawia missile kah dan tur ruahmanna chu ngun taka zir chiangin, a sipai hotute nen an sawi ho a, Kim-a hian Korea ram leh a chhehvelah US hi a inrawlh zui zel chuan he ruahmanna hi a taka chantir a ni dawn niin a sawi a, US chu a ram bul hnaia nuclear ralthuam bun hmasatu leh buaina chawk chhuaktu-ah puhin, US hian indo emaw, buaina tihpunlun emaw a duh loh chuan thutlukna dik siam hmasa se a duh thu leh, a chet danah pawh lan chhuahtir se a duh thu a sawi a ni. Nimin khan US Defence Secretary, James Mattis-a chuan Guam lam hawiin North Korea-in missile a kah pawhin, US sipaite’n an kap thla thei niin a sawi a, Mattis-a hian thuthar lakhawmtute hnenah he thu hi sawiin, US sipaite’n North Korea missile thlawh dan tur hi an hre thei dawn tih sawiin, Guam a kap fuh dawn nia a lan chuan an kap thla nghal dawn niin a sawi a ni.