Gujarat Assembly inthlan lo awm turah Congress, NCP leh JDU ten thawh ho chungchang sawi

Thla thara Gujarat Assembly inthlan lo awm tur boruak a sang sawt hle a, nimin khan Congress party hruaituten Nationalist Congress Party leh Janata Dal United party hruaitute kawmin, thawh ho chungchang an sawipui a ni. Puan tawh angin JDU party chhungkuaah hian buaina a awm avangin, a phel mai rin a ni a, Congress party nena inbia hi Sharad Yadav-a kaihhruaite an ni a, an pawl phel lehlam, Bihar CM, Nitish Kumar-a kaihhruai chuan BJP an thlawp thu an lo sawi tawh a, JDU buaina chungchangah hian nimin vek khan Election Commission chuan Pu Nitish Kumar-a kaihhruai pawl zawk hi Janata Dal United party-a an pawm thu leh an party chhinchhiahna pawh an hman chhunzawm a phalsak thu a sawi a ni. Gujarat-a Congress party General Secretary, Ashok Gehlot chuan inthlan chuhtu turte pawh an peih fel thawkhat tawh nain, Sharad Yadav-a kaihhruai JDU leh Nationalist Congress Party nena an inbiak mek avangin, inthlan chuhtu tur chungchang hi ni hnih khat hnu velah an puang chauh dawn niin a sawi. Puan tawh angin inthlan chuh turte hming pek luh theih hun hi kar leh Thawhlehni, tun thla ni 21 thleng hawn a ni.