Gujarat Rajya Sabha inthlan-ah Ahmed Patel, Amit Shah leh Smiriti Imrani te tling

0
342
views

Election Commission-in nimina Gujarat-a Rajya Sabha member thlanna-a Congress MLA pahnih vote a pawm loh hnuah, nizan zan lai pelhah khan Congress hruaitu, Ahmed Patel-a chu tling tura a vote mamawh zat, 44 chiah chiah hmu-in, thlan tlin a ni. Gujarat hian Rajya Sabha-ah seat thum neiin, rin lawk angin seat dang pahnih hi chu vote 46 ve ve hmutu, BJP hruaitu, Amit Shah-a leh Information and Broadcasting Minster, Smriti Imrani-i te’n an la a ni. Inthlan neih a nih hma khan Congress chuan Pu Amit Shah-a hnena an ballot paper hmuhtu, party MLA pahnihte chu an vote pawm sak lo turin EC an ngen a, uluk taka a endik hnuah EC chuan MLA pahnihte hian thuruk an tiput ru ni a sawiin, an vote pawm a nih loh tur thu a puang a ni. Pu Patel-a hi Congress MLA 44-in vote tura ngaih ni mah se, MLA zingah hian party kalh zawnga vote thlak an awm avangin party atangin vote 43 a hmu a, Congress hruaitu vote tlingtu hi tunge a nih hriat a la ni lo a, amaherawhchu Pu Patel-a hian Janata Dal MLA, Chhotubhai Vasava leh Nationalist Congress Party MLA pahnihin an vote a beisei thu a lo sawi tawh a, a tu emaw berin an vote a nih rin a ni.