Himachal Pradesh CM tur la tifel lo

Himachal Pradesh-ah erawh chuan CM thar tur hi tihfel theih a la ni lova, an hmunpui a\angin Central observer atan Union Minister pahnih, Nirmala Sitharaman leh Narender Tomar tirh ni mah se, an hruaitu tur hi an la tifel thei lo nia hriat a ni. Anni pahnih hian an party hruaitute leh RSS mi pawimawhte pawh an kawm nual tawh a, CM nih inbeisei pahnih, Prem Kumar Dhumal leh Seraj bial a\anga thlan tlin, Jai Ram Thakur-a thlawptute chu an la inrem thei lo a, Shimla-a Hotel Peterhoff-ah an inau tawn nasa hle nia hriat a ni. Heng hruaitu pahnih lam\angte hian an Central observer-te motor pawh an hual nia sawi a ni a, nimin chhunah khan Sitharaman leh Tomar-a hian biak tura an ngaihte leh BJP hruaitu pawimawhte an bia a, tlaiah Delhi an pan leh ta a ni. Central observer-te hian boruak a sosan zawk an hlauh avangin an party MLA tharte chu an kawm lo nia hriat a ni. Pu Dhumal-a thlawptute chuan, MLA 44 zinga 26 an chang nia sawiin, tun hnaia inthlanah khan Pu Dhumal-a hi tla mah se, a pumpuia an chak chhan ber niin an sawi a, BJP hruaitu \henkhat erawh chuan, tling zo lo na na na chu CM atana dah \ha an tih loh thu sawiin, Jai Ram Thakur-a hi RSS lam mi, politics-ah pawh tawn hriat ngah tawh tak a nih avangin CM atana thlan ve phawt \ha an tih thu an sawi thung a ni. Central observer-te bula an party mite an inau tawn chiam mai chu Kangra MP, Shanta Kumar-a chuan \ha a tih loh thu sawiin, hruaitute zah lo leh inthunun thei lo chu hrem \ha a tih thu a sawi. Central Observer-te report hi party thuneitu sangten an thlir ho hunah, thu tawp chu siam a nih rin a ni.