Independence Day pualin PM-in hnam puanzar pawt pharh, thuchah sawi

0
423
views

Ram zalenna champha, vawi 70-na chu vawiin khan ram pumah lawm a ni a, tih dan pangngaiin Delhi-a Red Fort-ah PM, Narendra Modi-a’n hnam puanzar pawt pharhin mipuite hnena thuchah a sawi a, tun hi Independence Day-a thuchah a sawi vawi lina a ni. Pu Modi-a hian tukin khan hnampa, Mahatma Gandhi-a hriatrengna hmun, Rajghat-a tlawhin zahna a lantir a, hemi hnu hian PM hi Finance leh Defence Minister, Arun Jaitley, Minister of State for Defence, Subhash Bhamre leh Defence Secretary-te’n Red Fort-ah an lo dawngsawng a ni. Pu Modi-a hian Uttar Pradesh-a Gorakhpur damdawi ina naupang kum tling lo 70 chuang thihna leh ram chhunga fur ruah sur nasa avanga chhiatna thleng chungchang sawi hmasain, chhiat tawkte leh an chhungte chu a tuarpui thu a sawi a ni. PM hian India thar din a tum thu sawiin, thangtharte chu ram siam that leh tihhmasawn kawnga tan la tur leh ram tana inpe turin a sawm a, ram zalenna kum 75 tlinna tur, kum 2022-ah chuan India thar din tumin beihpui a thlak dawn tih sawiin, hemi atan hian pawl hran, Team India a din dawn tur thu leh, hei hian nasa taka ram a tihhmasawn tur thu te, India chu chi inthliarna, eirukna leh hlemhletna leh mi firfiak pawlte awm lohna ram a nih tur thu leh mi retheite chawikan an nih tur thute a sawi a ni. J&K chungchangah PM chuan, Kashmir-a buaina chu ralthuam leh tharum thawhna hmanga chin fel theih a ni lo a, hetih rual hian mi firfiakte chungah zahngaihna lantir tur a ni lo, a ti bawk. Pu Modi-a hian tun hnaia bawng humhalh avanga inthahna thleng chu demawm a tih thu sawiin, sakhaw thil beh chhana tharum thawh chu thil dik lo hulhual a nih thu a sawi. Sorkar laipuiin nikum November ni 8-a tangka note lian pahnih a tihtawp hnuah cheng vbc. nuai tam tak, bank-ah dah that a nih tawh thu leh dik lo taka sum la lut nia rinhlelh, mi 18,00,000 chuang, enthlak mek an nih thu pawh PM chuan a sawi a, ram sum dinhmun ti chhia a, sum chheprelh thinte chu tui takin an mu thei tawh lo niin a sawi. Kum kal ta lam ang lo takin PM hian darkar khat chhungin a thuchah hi a sawi zo hman a, thla hmasaa Radio-a an kawmnaah Pu Modi-a hian thu a sawi rei thin avanga sawiselna lehkha a dawn fo thu a lo sawi tawh a, vawiin kha Independence Day-a thu a sawi rei loh ber tum a la ni.