Iraq sipaiten al-Ayadiya bei mek

0
620
views

Iraq sipaiten Tal Afar tlanchhiatsantu, mi firfiakten an pan, khaw lian vak lo, al-Ayadiya chu an bei mek a, Mosul khawpui lak kir tuma an beihna ai khan a let tam takin a hautak zawk niin an sawi. Mi firfiak ruhkawl tak tak tam tak chu he khuaa in tam takah an tawm a, tualchhung mite tihhlum tel vak a hlauhawm avangin, sipaite tan chet a khirh hle niin sipai hotuten Reuters an hrilh a ni. Iraq sipaite hian June thla khan Islamic State mi firfiakte kut atangin Mosul hi an la fel a, la fel tur hian mi firfiakte nen hian thla 8 chhung an inbei a ni. Iraq sipai hotu pakhat, Colonel Kareem al-Lami-a chuan al-Ayadiya khuaa mi firfiak hmatawngte beihna ringawt pawh hremhmun kawngka hawn ang mai niin a sawi a, he khua hi lian lo mah se, mi firfiakte hi tualchhung mite an inchiahpiah vek avangin tih ngaihna a vang hle niin a sawi. Iraq sipaite hian tun hnaiah Islamic State ho awp reng, Tal Afar khawpui hi an la fai deuh vek a, he khawpui hmarthlang lam km. 11 chauhva hlaa al-Ayadiya hi an lak fel theih chuan, Tal Afar hi la fai vekah an inngai thei dawn a ni. Mi firfiakte beih hi a khirh em avangin sipaite chuan indo thlawhna hmanga chet tam an tum a, khawmual leh thlawhna sipaite, Police leh US hnuaia training nei tawh, Counter-Terrorism Service hote pui tur hian Police tam zawk rawih an rawt a ni.