Kerala-ah bawng sa khap a ni ve dawn lo

0
422
views

Union Minister of State thar, KJ Alphons-a’n Kerala-ah bawngsa khap a nih ve loh tur thu a sawi a, puan tawh angin, Pu Alphons-a hi Pathianni khan sorkar laipuia Minister of State atan lak luh a ni a, Tourism and IT enkawl tur a tih a ni a, Kristian tha tak a ni. Minister chuan sorkar laipui leh Kristian-te inkara palai a nih tur thu sawiin, Pu Modi-a sorkar chu sakhaw zalenna thlawptu nia a ngaih thu pawh a sawi a, sakhaw hrang hrangte chu sorkarin a humhalh a, Kristian leh Muslim biak in hal leh tihchhiat a la awm lo niin a sawi bawk. Pu Alphons-a hi Kristian ni chunga talh atana bawng lei leh hralh khaptu, BJP sorkara a tel avangin hemi chungchangah hian zawhna pawh a dawng ngun hle a ni. Goa CM leh BJP hruaitu, Manohar Parrikar-a pawhin tun hnai khan state mipuiten bawng sa ei tur an tlakchham ngai loh tur thu a sawi a, Pu Alphons-a hian hei hi a tawmpui thu sawiin, ei thiang leh thiang lo chungchangah hian state tinin zalenna a nei niin a sawi a, hei vang hian Kerala-a pawh bawngsa an ei zel dawn tih sawiin, BJP sorkarin hei hi dodal lo niin a sawi bawk.