Ni 4 chhung awh tur, North East Zone Inter State Badminton Championship chu vawiin chawhma khan R. Dengthuama Indoor Stadium-ah CM, Pu Lal Thanhawla’n a hawng. He badminton championship-ah hian Hmarchhak biala state 8 aiawh an tel kim a ni. North East Inter State Badminton Championship hi Badminton Association of India programme pakhat a ni a, kum tina National Inter State Team Championship atana Zone tin atanga tel tur zawnna a ni a. Senior Mixed Team leh Junior Mixed Team a Champion-te hi North East Zone aiawhin National Inter State Team Championship-ah an tel thei dawn a, Open singles-a semi final chin leh doubles finalist-te pawh National Championship leh Open-ah an tel thei dawn bawk a ni. Tun tumah hian Mizoram Team telin player leh Official-te hi mi 155 an ni.
