Kum 2002-a Godhra-a thil thleng chungchangah Gujarat High Court-in mi 11 hremna tidanglam

0
305
views

Kum 2002-a Gujarat-a Godhra rel station-a Sabarmati Express rel pindan hal chungchangah vawiin khan Gujarat High Court chuan he thila thi tura tih tawh, mi 11 chu dam chhung lung in tang zawk turin a ti a, Special Investigation Team court-in he thubuaia dam chhung lung in tang tura a hrem, mi 20 hremna erawh chu a tidanglam lo a ni. Kum 2002 February thlaa Godhra rel station-a pawi khawihna thlengah khan mi 58 vel an thi a, thi zingah hian hmeichhia 27 leh naupang 10 vel an tel nia hriat a ni a, thi zinga a tam zawk hi chu UP-a Ayodhya a Hindu sakhaw hmun pawimawh tlawha kal haw an ni a, kha thil thleng avang khan thla hnih thla thum vel chu he state-a Hindu leh Muslim-te inkarah buaina leh tharum thawhna nasa tak a thleng a, mi 1,000 vel an thi a ni. Puan tawh angin, Godhra buaina-a thi, Muslim pakhat, MP hlui, Ehsan Jafri-a nupui, Zakia Jafri chuan, Special Investigation Team-in khatih laia state CM, Narendra Modi leh mi dang \henkhat thiam a chantirna, court hniam zawkin a pawm tawh chu High Court-ah hian a thlen a, mahse High Court chuan hei hi a hnawl rualin, he thil chhui nawn leh dilna, thuneitu sang zawka thlen erawh chu a phalsak a ni.