Lungalhthei laih chhuahna pukah hian mi 15 chu hapta thum dawn lai an tang tawh a, Meghalaya sorkar chuan chhanchhuah hna hi chak leh zuala thawh zel a ni a ti a, chhanchhuah hna thawktute chuan thil rim chhe tak an hriat thu an sawi avangin puka tangte hi an thi vek tawh maithei tih rindan a awm mek bawk. Heng mi 15 te hi December ni 13 a\ang khan lungalhthei khurah hian an tang tawh a ni.
Tui pumpna khawl lian siamtu, Kirloskar Brothers Ltd chuan tui pump chhuahna khawl lian zawk mamawh anih chuan Meghalaya sorkar \anpui tura an inpeih thu leh sorkar pawh an hriattir tawh thu an sawi a, anni hian nikuma Thailand puka tang naupang rual chhanchhuahnaah pawh khan an tui pump khawlte an lo thawh tawh a ni.
National Disaster Response Force chuan tun dinhmuna tui pump chhuahna khawl hman lai te chu a chak tawk lo hle tih an sawi a, Coal India Ltd lama mithiam, lungalhthei khura chetlak thiamte pawhin Meghalaya sorkar ngenna angin chhanchhuah hna thawh mekna hmun hi an thleng tawh a, anni pawh hian West BEngal leh Jharkhand lama tui pumpna khawl lian an neihte an chah mek a ni.
NDRF hnuaia tuilut thiamte chu puk chhung tui metre 70 vel chu metre 40 vela a thlak thlak ruala lut thei turin an inpeih a, tui pump chhuahna khawl hmanlai te a chak tawk loh avang leh awmze nei lova a lan vangin ni thum chhung lai chu tui pump chhuah hna hi chawlhsan tawh a ni.
