Meghalaya leh Nagaland Assembly inthlan lo awm turin ngaihven hlawh

0
353
views

Meghalaya leh Nagaland Assembly inthlan lo awm turin ngaihven a hlawh chho zel a, Kerala CM, Oommen Chandy chuan Meghalaya-ah hian Congress an chak leh ngei a rin thu leh hei hian nakum lama Lok Sabha inthlan lo awm turah pawh nghawng thui tak a neih a rin thu a sawi. Puan tawh angin Meghalaya-ah hian state pawn lam mi, party hrang hrang hruaitute an campaign nasa hle a, inthlan campaign hotu atan Chandy hi an party president, Rahul Gandhi chuan a ruat a ni. Chandy hian BJP-in kum 2014-a sorkarna a siam hma khan mipui hnenah thil tam tak an tiam nia sawiin, an tihhlawhtlin leh theih si loh vangin, mipui an lungawilo hle niin a sawi a, ramchhunga thil man to chho zel chungchang te, khawvel huapa tuialhthei man a tlakhniam laia, sorkarin petrol leh diesel man a tisang te chu hriatthiam har a tih thu te a sawi a, BJP sorkarna hnuaiah kut hnathawk leh loneituten an tuar nasa hle niin a sawi bawk.

Nagaland-ah pawh rorel lai Naga People’s Front hotu, Shurhozelie Liezietsu chuan BJP nen thawhho chungchanga an inbiaknaah seat insem dan turah an lungrual thei lo tih a sawi chhuak a, BJP-in seat insem dan tur a rawtna chuan nghawng tha lo tak a nei thei dawn niin a sawi. Puan tawh angin Nagaland-ah hian BJP chu party thar, Nationalist Democratic Progressive Party nen an thawk dun dawn a, NDPP hian seat 40 an hauh a, BJP-in seat 20 an hauh ve thung a ni. NDPP leh BJP thawhdunna hi Liezietsu chuan Naga mipuite hralha thuneihna chan tumna mai niin a sawi a ni.