Meghalaya, Nagaland leh Tripura-ah sorkar siamtu tur chiang tawh

0
948
views

Meghalaya inthlanah NPP chuan party dang thlawpna nen sorkar a siam thei dawn ta a, NPP hi UDP, BJP, PDF leh HSPDP MLA te bakah Independent MLA pakhatin an thlawp a ni. NPP kaihhruai tangrual pawl hian MLA 34 an nei tling a, NPP hotupa Conrad Sangma chu Chief Minister thar a ni dawn ta a, naktuk chawhma dar 10.30 ah rinawmna thu tiam tira lakluh a ni ang. BJP hruaitu Himanta Biswa Sarma chuan Congress tih loh, MLA dang zawngte chuan tangrual pawl hi an la zawm belh zel dawn niin a sawi. Hetihlai hian tun tum inthlanna-a party mala MLA ngah ber, Congress tan tih theih a awm ta lo a, MLA la bang zawng, KHNAM MLA 1, NCP MLA 1 leh Independent 2 te pawhin thlawp mahse, sorkar na siam thei turin an tan Majority neih ngaihna a awm ta lo a ni. Nimina Governor an hmuh zawh hnua chanchinbumite a kawmna ah Chief Minister ni mai tur, Conrad Sangma chuan MLA 34 hming an thehluh hi NPP MLA 19, UDP MLA 6 leh PDF MLA 4 te bakah HSPDP leh BJP MLA 2 ve ve te bakah Independent MLA pakhat te an ni tih a sawi a, Party dang MLA te hian Chief Minister atan amah chu an pawm vek tih Conrad Sangma hian a sawi bawk.
——————–

Nagaland Governor PB Acharya a’n rorel lai Naga Peoples’ Front NPF leh BJP leh Nationalist Democratic Progressive Party NDPP tangdunte chu sorkar siam turin thlawptu an nei tam tawk a ni tih fiahna hun a pe ve ve. BJP leh NDPP tangdunte hian sorkar an siam thei tih Governor hnenah nimin khan hriattir tawh mahse, Chief Minister TR Zeliang chu a inhukdawk duh lo a ni. NDPP leh BJP tangdun hian seat 29 an lak laiin NPF party, Zelianga kaihhruai hian NPP MLA 27 te bakah an thawhpuite nen member 30 an nei niin an insawi ve thung a ni. Nimin chhun khan Nagaland chief minister tum 3 lo ni tawh, Lok Sabha member hlui nibawk Neiphiu Rio leh a thawhpuite chuan anmahni thlawptu MLA hming 32 te hming nen Governor hi an hmu a, NPF member 16 te pawhin Zelianga ho hian Governor hi an hmu ve bawk. Kum 2003 atanga NPF thawhpuitu BJP chuan tun tum inthlanah khan NDPP hi an thawhpui a, NPF hminga thawh hona hnuaia kum 11 zet Chief Minister lo ni tawh Neiphiu Rio chuan NDPP hi a zawm ve nghal bawk a ni. Hetiang boruak karah hian Zeliang chuan an party NPF leh BJP thawhdunna chu a la tawp loh avang leh, NPF hnuaia BJP Minister tanglai te pawh an la inhnuhdawh loh avangin BJP chuan NPF chu a thlawp dawn niin a sawi. Nagaland Governor hian NDPP leh BJP tangdun pawh thlawptu an ngah tawk em tih finfiahna hun a pe bawk bawk a, NDPP leh BJP te hian MLA hming 32 thehlut mahse, MLA tam takin signature an pek loh avangin signature fel tak nena thehlut tha leh turin Governor hian a lo hrilh a ni. NDPP leh BJP te hming thehluh hi NDPP MLA 18 bakah BJP MLA 12 te hming leh JDU MLA 1 leh Independent pakhat hming a ni a, JDU MLA hi G Kaito Aye a ni a, Aye hian NDPP-BJP a thlawp thu sawi mahse, JDU State President chuan Zeliang hi a thlawp thu a sawi ve thung a, Governor chuan Aye-a hi an party president hnen atanga lehkha la turin a hrilh bawk. Governor hian Nagaland-ah sorkar ngelnghet leh chak tak din chu a thil duh ber a nih thu a sawi a, BJP pawhin kum 15 zet an lo thawhpui tawh NPF lakah an kut an silfai hmasak ve a tul a ni a ti.
——————–

Kum 25 zet rorel tawh CPIM kaihhruai sorkar chu BJP leh IPFT tangdunin an paihthlak tak avangin Tripura Chief Minister Manik Sarkar chuan Governor Tahagata Roy hnenah nimin khan a banna a thehlut ta. Kum 1998 atanga Chief Minister lo ni tawh Sarkara hi Governor chuan sorkar thar dinfel a nih hma chuan a hna lo chhunzawm rih turin a ti a ni. Raj Bhavan atanga a lo chhuak, chanchinbumiten an lo kawmnaah Sarkar hian amah leh a minister te chu mipuiten tha taka an thlawp thin avangin kum tam tak mipui rawng bawl theiin an lo awm tawh tih a sawi a, state mipuite leh sorkar hnathawkte chungah lawmthu a sawi bawk a ni. BJP leh IPFT tangdun ten Assembly a seat awm zawng zawng hmun thuma thena hmun hnih zet an hui avangin Tripura ah hian CPIM kaihhruai Left Front sorkar kum 25 zet lo ding tawh chu paihthlak a ni ta a, BJP leh Indigenous Peopls Front of Tripura IPFT tangdun hian seat 43 zet an la a, CPIM hian 16 an chang ve thung. CPIM candidate pakhat a thih avanga bial pakhatah inthlanna sawn hlat a nih avangin Tripura ah hian bial 59 ah inthlanna buatsaih a ni a, february ni 18 khan mipuiten vote an thlak a ni.