Nuclear ralthuam siam tawh lo tura North Korea nawrin awmzia nei lo- Russia President

Russia President Vladimir Putin-a’n nuclear ralthuam siam tum tawh lo tura North Korea nawr vak vak chu awmze nei lo nia a hriat thu a sawi a, US leh a thurualpui ramte pawhin North Korea hi pawng nawr tawh lo se a duh thu leh, thu delh kilh engmah awm lova an inbiak a tul nia a hriat thu a sawi a, invauna leh tharum thawh tumna leh indeusawhna chi reng rengin inremna kawng a hnawh ping zawk dawn niin a sawi bawk. Puan tawh angin, North Korea hian tun hnaiah ralthuam chi hrang hrang a en chhin nasa hle a, US President, Donald Trump nen pawh vawi eng emaw zat, tawngkam na tak takin an lo inhnial tawh bawk a, hei vang hian President Putin-a chuan North Korea buaina hi darh zau zel thei dinhmunah a ding reng niin a sawi bawk. North Korea hian Thawhlehni khan Japan lam hawiin missile a kap leh a, hei hi US leh South Korea ram sipaite’n indo nunchan an zir ho reng vang niin a sawi a ni. Russia President hi kar leha China rama BRICS summit-ah a tel dawn a, hemi hma hian a thuchhuak hi Kremlin website-ah tarlan a ni.