Papua New Guinea-ah lirnghing, mi 14 thi tawh

Papua New Guinea-ah nimin khan Richter Scale-a 7.5-a na-in lir a nghing a, mi 14 an thi a, midang eng emaw zat an hliam. Lirnghing hian thil a tihchhiat bakah, lei a ti-min nasa hle a, thi zinga a tam zawk pawh hi leimin-in a chhilh vanga thi an ni hlawm a ni. US Geological Survey chuan vawiin lam thleng pawh khan lir a la nghing chhunzawm zel tih an sawi a, aftershock an chhinchhiah zingah, Richter Scale-a 5.7 chu a la na ber a nih thu an sawi bawk a ni. Papua New Guinea Police-te chuan lirnghing leh leimina thi zat hi a la pun an rin thu an sawi a, an ram khawpui Port Moresby dâi vela tualchhung hotute chuan thi zat hi 30 vel a nih theih thu an sawi bawk a, International Red Cross hotute pawhin inbiakpawhna tam zawk a chhiat vangin chhanchhuah hna leh chhawmdawl hna pawh an la thawk tan thei lo tih an sawi a, Papua New Guinea-in tuialhthei a lakna ber, Exxon Mobil pawhin lirnghing hian an hmun eng emaw zat a tihchhiat thu leh, kar khat chuang chu an inkhar a ngaihtur thu an sawi bawk a ni.