PML-N hruaituin Pakistan PM hlui leh a fapate pahnih NCB hmaah inlan ringlo

0
495
views

Pakistan PM bang ta, Nawaz Sharif-a leh a fapa pahnih chu ei rukna chungchang chhuitu, National Accountability Bureau-in pawisa chhehrelh leh hlemhletna thilah inlan turin ko mah se, an inlan loh rin a ni a, Pu Sharif-a hian he kohna a hmuh hnuah hian, July ni 28-a Supreme Court thuchhuak avanga PM a nihna a bansan chungchang ngaihtuah nawn leh tura court a ngenna chu Supreme Court-in a tihfel hma chuan, National Accountability Bureau thil tihah hian tel a tum loh thu a sawi niin Pakistan Muslim League-Nawaz (PML-N) hruaitu pakhatin a sawi. Sharaf-a leh a fapa pahnih thu zawt fiah a, an thusawite chhinchhiah tur hian NAB mi 10-in Rawalpindi atangin Lahore an thleng tawh a, Sharif-a thu thehluh hi Supreme Court Judge, tuna chawlh mekten an hna an zawm leh hnu, thla leh tir lamah ngaihtuah a nih rin a ni. Pu Sharif-a hian NAB-in amah leh a chhungte a chhui dan chu mak a tih thu sawiin, NAB hian hmuh chhuah tum an nei sa niin a sawi a, an thil tum ang tak an hmuh chhuah theih nan hian NAB hnathawh dan hi Supreme Court judge pakhatin a vil reng niin a sawi bawk. Puan tawh angin, Pu Sharif-a leh a fapa pahnih, Hussain leh Hasan, a fanu, Maryam-i leh a pasal, Safdar leh an chhungte dang – Ishaq Dar lehg Tariq Shafi-a chu thubuai tam tak siamsak an ni a, hengte zingah hian company hrang hrang – Al-Azizia Steel Mills, Hill Metal Establishment leh Hudabiya Papers Mills chungchangte pawh a tel a ni.