President Ram Nath Kovind-a’n Gauhati University thlawh, rinawm leh taima taka ram mipuite hnathawk zel turin fuih

0
307
views

Hmarchhak bial tlawha zin mek, President Ram Nath Kovind-a’n nimin khan Gauhati University-ah thu a sawi a, ram mipui zawng zawngin mahni hna \heuh, rinawm leh taima taka an thawh chu ram hlawkna zel a ni tih sawiin, kum 2500 kal ta daih tawhah khan India ramah University din a lo nih tawh thu leh, ram pawn mite pawhin an lo pan fo tawh thute a sawi a, Assam leh hmarchhak biala state dangchu India leh Asia khawmualpui chhim-chhak ramte nena inthlun zawm kawnga dinhmun pawimawh luah an nih thute a sawi bawk a ni.

Puan tawh angin, President Kovind-a hian Pathianni khan Arunachal Pradesh a lo tlawh tawh a, hei hi China chuan nimin khan sawiselin, ramri chungchanga ram pahnih inbiak mekna tichhe thei thil niin a sawi a, China Foreign Ministry thupuangtu, Lu Kang chuan Arunachal Pradesh hi India rama an la pawm ngai loh thu leh, hemi chungchanga an ngaihdan an la sawh sawn loh thu a sawi a ni. China chuan Arunchal Pradesh hi Southern Tibet-ah chhalin a ram huam chhung niin a lo sawi tawh \hin a, sorkar mi pawimawhte’n he state hi an tlawh pawhin a lo sawisel fo tawh \hin a, tun thla ni ruka Defence Minister, Nirmala Sitharaman-i’n Arunachal Pradesh-a Line of Control a tlawh pawh khan China hotute chuan nasa takin an sawisel a ni. Ram inchuh chungchangah hian ram pahnih hi an lo inbe fo tawh a, thla thar hian New Delhi-ah inbiak \um 20-na neih leh an tum mek bawk a ni.