Shillong-ah Khasi leh Punjab mi te inkarah buaina a chhuak

0
1103
views

Shillong khawpuia Them Mowlong-ah mi \henkhatin State Transport Bus conductor an sawisak avangin Motphran leh a chhehvelah nizan a\ang khan buaina a chhuak a, District Magistrate, PS Dkhar chuan buaina punlun hlauhthawnawmna Motphran chhehvel veng hrang hrang huapin nizan a\ang khan curfew a puang. Curfew puanna te hi Jaiaw, Mawkhar, Umsohsun, Raitsamthiah, Wahingdoh, Mission Mawprem, Lumdiengjri, Lamavilla, Qualapatty, Wahthapbru, Sunny Hill, Cantonment, Mawlong Hat-ah te a ni. He conductor chunga kutthlak a nih avang hian State Transport Bus driver te leh helai hmuna Punjabi lane tia hriata chengte inkarah intihbuaina a chhuak a, buaina chhuak \helh nan hian Police te chuan mittui tlakna hlo an hman bakah van lam hawiin silai an kap a, thi an awm lo nia sawi a ni a, Police leh mipui thinrim innawrnaah hliam an awm nual nia sawi a ni. He boruak sosang avang hian vawiin chawhnu khan helai bial velah hian zirna in zawng zawng khar a ni a, he buaina chhuak hian tualchhung mite leh Punjabi lane amite inkarah chi leh chi lam hawia buaina lian zawk a thlen tir theih avangin Police te chu ngawrh taka duty tir an ni a, CRPF pawh chhun zan zawma duty tura tirh an ni. Helai bial velah hian social media-a thu inthawn theihna internet service zawng zawng pawh tihtawp rih a ni. He buaina kaihhnawihah hian Khasi Students Union chuan vawiin khan Emergency Meeting an koh a, buaina siam chhuaktute chu man vek an phut bakah mi kut tuar bus conductor chu zangnadawmna pe turin sorkar an phut a ni.