Shujaat Bukhari vui a ni

0
577
views

Nimin tlaia Srinagar-a chanchinbumi pakhat mifirfiakten an kahhlum Shujaat Bukhari-a ruang chu vawiin khan vui a ni a, amah suntu mipui tam takin kawng an zawhpui.

A pianna khua Baramulla Kreeri hmunah Bukhari ruang hi zalh a ni a, ruah nasa taka a sur chungin mipui tam takin kawng zawhpuiin an thlahliam a ni. Rising Kashmir tih chanchinbu editor in chief Bukhari hi mifirfiak pathum, bike-a chuangten an kaphlum a, kum 52 mi Bukhari hian Srinagar Press Enclave a chhuahsan hnua car-a a chuanglai chu mifirfiakte hian hnai tak a\angin an kap a, a taksa hmun engemawzatah silaimu a lut a ni. Bukhari hi Kashmir chungchanga Pakistan aiawhte nena inbiakna nikum lama Dubai-a neihah a tel a ni. Kahhlum anih hnu lawk hian police te chuan a kaptu nia rinhlelh mi pathum bike-a chuang te CCTV in a lo lak chu an ti chhuak nghal a, an pathum hian an hmai a hmuh chian theih loh vek aa laia chuang chuan silai ni awm tak ip chhunga khung a keng a, Police te chuan tute nge an nih finfiah thei an awm chuan anmahni hriattir thuai turin mipuite an ngen a ni. Amah vengtu Security Guard pahnihte pawh kahhlum tel an ni a, Bukhari hi kum 2000 khan thah tuma beih a lo ni tawh a, khami hnu khan security guard hi pek a ni. Tualthattute hian Bukhari chhuak tur hi an lo chang lawk a, chet an lak ve hmain an kap nghal tih Jammu and Kashmir Police hotu SP Vaid chuan a sawi.