Naktuka sorkar laipuia Minister lak luh belh turah AIADMK leh JD (U) an tel dawn leh dawn loh hriat a la ni lo a, Tamil Nadu-a rorel lai, AIADMK chhungkuaah hian inlungrual lohna a awm avang leh, TTV Dhinakaran-a leh a zuitute lungawi lohna hi chin fel a nih loh chuan, sorkar laipuiah an tel lo mai thei nia sawi a ni a, JD (U) hotute pawhin vawiin tlai thleng khan sorkar hotute hnen atangin engmah an la hre lo niin an sawi. Puan tawh angin, naktuk chawhma dar 10-ah Rashtrapati Bhavan-a inkhawm buatsaihah Union Minister thar atan mi engemawzat lak luh an ni dawn a, hemi atan hian Minister ni lai an bang nual tawh bawk a, Kalraj Mishra, Bandaru Dattatreya, Rajiv Pratap Rudy, Sanjiv Kumar Balyan, Faggan Singh Kulaste leh Mahendra Nath Pandey an ban tawh bakah, Uma Bharti pawhin ban a inpeih thu a sawi. Niminah khan BJP President, Amit Shah leh PM, Narendra Modi-a’n naktuka Minister atana lak luh turte leh sorkar ruangam tur an ching fel tawh nia hriat a ni a, Arun Jaitley chu Finance leh Defence chelh kawptir a ni tawh lo ang a, Road Transport and Highways minister, Nitin Gadkari chu mawhphurhna pek belh a nih rin a ni Railway minister, Suresh Prabhu chu hna dang pek a nih rin a ni a, Minister thar atana rin laite zingah Assam atangin Pu Himanta Biswa Sarma pawh a tel a ni. Sorkar ding laiah hian Power minister Piyush Goyal, Petroleum minister, Dharmendra Pradhan leh Telecom minister, Manoj Sinha te chu hnathawk thaa ngaih an nih avangin dinhmun sang zawka dah an nih rin a ni a, Nitish Kumar-a kaihhruai, JD(U) atangin RCP Singh leh Santosh Kumar , AIADMK atangin P Venugopal leh V Maitreyan an luh rin a ni bawk. Tunah hian PM telin sorkar laipuiah hian Minister 73 an awm a, ram danpuiin Lok Sabha member zaa 15 aia tam, Minister-a dah a khap avangin Minister 81 aia tam an awm thei lo a ni.
Chanchin Thar Sorkar laipui minister lak luh belh turah AIADMK leh JD(U) an tel...
