NEET chungchanga PIL thehluttu Anitha inawkhluma hmuh a ni

National Eligibility and Entrance Test chungchanga Supreme Court-a PIL thehluttu, kum 17 mi, Anitha-i chu nimin khan a chenna inah inawkhluma hmuh a ni a, he thil thleng avang hian vawiin khan Tamil Nadu khawpui, Chennai-ah buaina nasa tak a chhuak a, Tamil mipuite chuan Anitha-i thih chhanah hian sorkar laipuiin mawh a phur niin an ngai a ni. Chennai atanga km 300 vela hla, Ariyalur district-a awm, Anitha-i hi hnam hnufual, Dalit mi, mi tum ruh, lehkha zir peih leh thiam thei tak a ni a, doctor nih tumin theihtawpin lehkha a zir thin nia sawi a ni a, pawl 12 board exam-ah khan mark 1,200-ah 1,176 hmuin, damdawi lam zirna leh engineering lam zirnaah a tling ve ve a, amaherawhchu tun thlaa Supreme Court thupek behchhana sorkarin Tamil Nadu-a damdawi lam zirna hmunpuia zir tumte chu an pawl 12 result ni loin NEET-a an tih that dan a zira lak an nih tur thu a puan avang khan a rilru a hah hle a, court sang ber hnenah dilna lehkha thehlutin, NEET tlin tumte tana a hranpaa inzirtirna, coaching class kal turin pawisa an neih loh thu a hrilh a, mi harsa zawkte tan tlin ngaihna a awm lo niin a sawi a ni. Thla eng emaw zat liam ta khan court sang ber hian Anitha-i PIL thehluh hi a hnawl a, a chhungte leh amah lainattute chuan Anitha-i intihhlum chhanah hian Supreme Court bakah, sorkar laipui pawhin mawh a phur niin an ngai a, vawiin khan Chennai-ah mipui pung khawmin kawng an zawh a, BJP kaihhruai sorkar an demna thu au chhuahpuiin, buaina nasa tak a chhuak a ni. Lungawi lohna lantirtute hian kawngpui pawh an dang a, Police ten hmeichhe 80 telin mi 450 an man a, Chennai-a hmun hnihah PM lim an hal bawk.