Sorkar laipuiin Sikkim leh Arunachal Pradesh-ah sipai thawn belh

Ramri chungchanga India leh China inkara boruak sosang mekah, sorkar laipuiin Sikkim leh Arunachal Pradesh-ah sipai a thawn belh. Sorkar hotute sawi danin, Doklam chungchanga China thil tih dan leh thil awm dan ngun taka zir chian a nih hnuah sipai hi thawn belh a ni a, sipaite hi inralring tura hriattir an nih bakah, hmarchhak biala ramri veng tura dah an ni. Puan tawh angin, India, Bhutan leh China inkara awm, Doklam hi Bhutan chhunga awma ngaih leh pawm tlan ni mah se, China-in a ram chhunga awmah ngaiin, a sipaite’n kawng an siam a, Bhutan sorkar ngenna anga India sipaite, China sipaite hnathawh titawp tura Doklam-a an kal hnu khan China chuan India sipaite hi a ram chhungah lutah puhin, Sikkim-a ramria inkalpawhna, Nathu La kawng a khar a, India sipaite hi Doklam atanga la chhuak turin India sorkar a hrilh bawk a ni. External Affairs Minister, Sushma Swaraj-i chuan tun hnai khan tawngkaa buaina ching fel tur chuan ram pahnih sipaite hi Doklam atanga lak chhuah hmasak a tul thu a sawi a, muanawm taka boruak tihdaih chu a tha ber tih a sawi.