Syria sipaiten tuialhthei laihchhuahna la let, Bus-a tlanchhiat phalsak te umzui tawh lo turin Russia in US ngen

0
292
views

Syria sorkar sipaiten tuialhthei laih chhuahna hmun pakhat chu Islamic State-te kut atangin vawiin khan an la let. Syrian Observatory for Human Rights chuan IS mi firfiak pawl zinga a tam zawk tlanchhiatna hmun, al-Mayadeen chhuntu kawngpui pawh Syria sipaite leh an thawhpui, tangrual pawl sipaiten an la let tel tih an sawi a, hemi hma lawk hian IS ho awp khawpui dang, Deir al-Zor khawpui chu tangrual sipaite hian chhak lam atangin an lut tan tawh bawk a, helai hnaiha tumhmun lak tumin an bei mek niin an sawi bawk, Syrian Observatory for Human Rights chuan khawpui pahnih inkal pawhna hi tangrual sipaiten an lak tak avang hian, IS mite hi an intlawh pawh zung zung theih tawh dawn loh bakah, ralthuam leh sipai pawh an inthawn zung zung thei tawh dawn rih lo niin a sawi. US thlawp, Syrian Democratic Force leh pawl dangte pawhin Deir al-Zor khawpui lak tum hian vawiin atang khan khawpui hmar lam atangin sipai an tirh belh a, Euphrates lui chhak leh hmar lama IS mi la awmte an bei hmasa dawn tih SDF thuneitute chuan an sawi a, SDF leh Kurdish YPG sipaite chuan Raqqa bial hi za zela 65 chu an la tawh niin an insawi a ni.

Lebanon rama Shia muslim pawl, Hezbollah leh Islamic State mi firfiak pawlte inkara inremna avanga ramri hnaih, Bukamal-a inthiarfihlim phalsak, IS mite leh an chhungte phurtu, bus 17 zinga 11 chu kawngpui chhiat avangin Syria thlalerah an tang mek bawk a, heng bus-te en zuitu, US sipaite chu inthiarfihlim tur leh, bus-a chuangte himna chu Syria sorkar mawh a nih tawh avanga inrawlh tawh lo tura Russia-in a ngen avangin, US indo thlawhnate hian an kalsan tawh a ni. Puan tawh angin, heng bus-ahte hian IS mi firfiak pawl, indona tlanchhiat duhte leh an chhungte an chuang a, US sipaite chuan an vil zui reng a, an zawh tum kawngpui chhiat chhan pawh hi an kal tumna hmun pan lo-a kawng dang an zawn avanga US indo thlawhna te’n an lo dan vang a ni a, US sipai hotute chuan bus-ah hian hmeichhia leh naupang an chuan avangin kawngpui hi an kap chhe ta zawk niin an sawi. Hezbollah thupuangtute chuan bus 17 zinga 4 chu ISIS awp ramah an kal ngei niin an sawi a, US sipai hotute chuan bus zingah hian Syria sorkar awp ram emaw, US thlawp tangrual sipai awp ram thleng an awm lo niin an sawi thung a, bus-a chuang ve, tlanchhiat tum mi firfiak 85 an kap hlum tih an sawi bawk a ni.