Syria sorkarin tûr ralthuam a siamna leh a dahthatna hmun nia sawi Israel-in a kap

0
354
views

Syria sorkarin tûr ralthuam a siamna leh a dahthatna hmun nia sawi chu Israel-in a kap. Syria sorkar sipai hotute chuan Israel hian Hama-a an sipai hmun a bei niin an sawi a, sipai pahnih an thi niin an sawi bawk. Syrian Observatory for Human Rights chuan Israel-in a beih hmun hi Scientific Studies and Research Centre niina sawi a, he hmun hi US chuan Syria-in tûr ralthuam a siam chhuahna hmunpui ber niin a lo sawi tawh thin a ni. Puan tawh angin kum April thla khan Syria hian tûr ralthuam hi a hmang leh nia sawi a ni a, kha inbeihna chhuitu, UN mite chuan Syria sorkar hian hetiang ralthuam hi a hmang ngei niin nimin khan an sawi a ni. Syrian Observatory chuan tûr ralthuam siam chhuahna hmun bula awm, Iran leh an thurualpui, Lebanon mi firfiak pawl, Hezbollah sipaite hmun pawh Israel hian a kap fuh tel tih a sawi bawk a, Israel chuan he inbeihna chungchangah hian engmah a la sawi lo a, media miten kawm an dilna pawh an la hnawl rih a ni.