Union Minister 8 velin BJP President, Amit Shah an hmu

0
373
views

Sorkar laipui Council of Ministers chu ni hnih khat chhungin siksawi a nih rin a ni a, vawiin khan Union Minister 8 velin BJP President, Amit Shah chu New Delhi-a a chenna inah an hmu tih hriat a ni. An zingah hian Finance Minister, Arun Jaitley pawh a tel a, ani hian a hmaa Manohar Parrikar-a enkawl thin, Goa CM a nih tak avanga a kalsan, Defence a la enkawl tel a ni. Pu Jaitley-a chuan Ministry lian pahnih – Finance leh Defence chu a enkawl kawp rei a rin tawh loh thu a sawi a, Council of Ministers hi naktukah emaw, Inrinni-ah emaw tihdanglam a nih rin a ni a, ram danga zin, President Ram Nath Kovind-a lo haw hnu, September ni 3 atanga China-a BRICS summit-a tel tura PM a kal hma si-in Minister te hi tihdanglam an nih rin a ni. Tun tumah hianAIADMK pawh sorkarah an tel tawh rin a ni a, Cabinet Minister 1 telin Minister 3 vel an neih rin a ni a, hetiang deuh bawk hian Janata Dal (United) pawhin Minister pahnih emaw an neih rin a ni. Minister ni lai thenkhat chu Larsap-ah dah an nih rin a ni a, tunah hian Larsap hna 7 a ruak mek a ni. Tun hi Pu Modi-a kaihhruai sorkar, kum 2014-a a lo din atanga Council of Ministers siksawi a nih vawi thumna tur a ni.