Trump te hi presidential jet Air Force One hmangin Ahmedabad-ah an \um a, Ivanka Trump leh a pasal Jared Kushner ten rawn \awiawmin, Prime Minister, Narendra Modi-a’n a lo dawngsawng a ni.
Hemi hnu hian cricket stadium atana sak thar, Ahmedabab-a Motera Stadium-ah Namaste Trump hun hman a ni a, mipui \hahnem tak pungkhawm hmaah Prime Minister, Narendra Modi-a’n Trump-a te lawmna thu sawiin, US tan ham\hatna thar India-ah hmuh tur a awm a ni a ti a, sum peipunna kawngah pawh US tan ham\hatna tur tam tak a awm tih sawiin, India leh US chu leilung dan anga inkawp tlat an ni a ti a, hmathlir thui tak an nei dun a, inlaichinna kawngah bung thar an kai a ni a ti bawk.
Modi-a thusawi zawh hnuah Trump hi lo ding chhuakin Modi chu hruaitu \ha tak a ni a, mi zawng zawngin an ngainain a thawk rim em em a ni a ti a, India chu a ram chhung mipuite tan beiseina petu a ni a, chutiang bawkin America pawhin India chu a ngainat bakah a zah hle a ni a ti a, kum 70 kalta a\anga India din chhuah dan chu hriatreng tlak a nih thu sawiin, kum 20 chhung lekin nasa takin a \hang a, a chhunga chengte pawh ram dangte ngaihtuahin phurna nasa takin a tuam niin a sawi bawk. Trump chuan India leh US inlainchinna chu a \ha lam zawngin a kal zel a, an inkungkaihna pawh a \ha tawh hle tih a sawi bawk.
Trump hian India ram pana a thlawh chhuah hma, Pathianni zan khan Modi nena an thawhdunna a \hat thu leh \hian \ha tak a nih thu a sawi a, ram tana an thawhdunna chu tihpun zel a duh tiha sawi bawk.
Trump hi ni hnih chhung India-ah hian a cham ang a, hemi chhung hian Modi nen US leh India ram insumdawn tawn dan tur leh \ha zawka an thawhdun dan tur te an sawi dun dawn a ni.
