US-in hrek tum vangin N.Korea-in vau

0
471
views

North Korea chuan nuclear bomb a en chhin avanga US sorkarin na zawka hrek tuma a beih zui chuan thil pawi tak a thleng dawn tih a sawi a, North Korea sorkar media, Korea Central News Agency sawi danin, US-in hrek belh a tumna hi a taka chantir a nih chuan North Korea-in na takin a chhang let dawn nia sawiin, US hian North Korea-in a ram ven himna atana nuclear ralthuam a siam chu chhuanlamah hmangin, North Korea hi tih chhiat a tum niin a sawi. Hemi chungchangah hian North Korea Foreign Ministry chuan thuchhuah siamin, US-a chhan letna turah hian North Korea sorkar chuan eng thil pawh tih a huam niin a sawi a, US tuar tur hi a na hle dawn niin a sawi bawk. North Korea hian US leh a thurualpuite beih let nana a hman tur leh Korea ram leh a chhehvela nuclear indona thleng tur venna ni pahfawmin, nuclear ralthuam hlauhawm tak a siam chhuak tawh niin a sawi a, tun thla ni 3-a nuclear bomb chi khat, hydrogen bomb a en chhin chu North Korea hruaitu lu, Kim Jong Un-a chuan a hlawhtling hle niin a sawi a, hei hi North Korea-in nuclear ralthuam a en chhin vawi rukna a ni a, a lawm nan Pyongyang khawpuiah kar kal ta khan ruai a buatsaih a ni.