Vice President thar atan M Venkaiah Naidu

0
557
views

Vice President 15-na atana thlan thar, M Venkaiah Naidu-a chu Zirtawpni, ni 11-ah lak luh a ni dawn a, Pu Naidu-a chuan thlan tlin a nihna hian ram democracy mawina leh chakna a pholang niin a sawi a, ram danpui tlawhchhana, dan leh hrai ken kawh tiamin, dik leh fel taka thawh a tum thu a sawi. Puan tawh angin, Inrinni khan Parliament House-ah VP thar thlanna neih a ni a, eptu pawl, UPA candidate, Pu Gopalkrishna Gandhi-a chuan vote 244 hmu-in, vote 516 hmutu, rorel lai sorkar, NDA candidate, Pu Naidu-a chu thlan tlin a ni a, inthlanah hian vote 771-a tla a, vote 760 chu pawm a nih laiin vote 11 erawh pawm a ni lo a ni.

BJP President hlui, Pu Venkaiah Naidu-a hi kum 1949, July ni 1 khan Andhra Pradesh-a Nellore district-a khaw pakhat, Chavatapalem khuaah piangin, chhungkaw harsa tak atanga sei lian a ni a, a pa hi loneitu a ni. College a zir lai atangin politics luh chilh tanin, politics lama Hindu pawlpui, RSS leh Hindu zirlai pawl, Akhil Bharatiya Vidyarthi Parishad-ah a inhmang nasa thin a, Visakhapatnam-a Andhra University College of Law atangin LLB a zir chhuak a ni. Kum 68 mi, Pu Naidu-a hi NDA-in VP candidate atana an thlan khan Information and Broadcasting Minister leh Housing and Urban Poverty Alleviation bakah Urban Development Minister nihna a chelh a, VP inthlan a chuh dawn avangin Minister a nihna atangin banna a thehlut a ni. Kum 1978 atanga kum 1983 inkar chhung khan Andhra Pradesh Legislative Assembly member a ni a, kum 1998 atanga kum 2016 thleng khan Karnataka atangin Rajya Sabha MP a ni bawk a, kum 2014 atanga kum 2016 inkar chhung khan Pu Naidu-a hian Parliamentary Affairs Minister hna a lo chelh tawh bawk a ni.