3rd International Boxing Championship Senior & Youth Women Gold Medalist chawimawina nei

0
750
views

Bulgaria Sofia-a 3rd International Boxing Championship Senior & Youth Women neih zawh taka Gold Medal dawngtu, Lalfakmawii Ralte chawimawina vawiin chawhnu khan Sports & Youth Services Minister, Pu Zodintluanga Pisa-ah neih a ni. He lawmpuina inkhawmah hian Sports & Youth Services Minister, Pu Zodintluanga chuan Mizo infiammite hi sports discipline hrang hrangah an inchherchhuak chho mek niin a sawi a, India rama mi maktaduai tam tak awm zingah India ram aiawh thei leh medal hial hawn thei Mizoramin a nei chu thil lawmawm leh chhuanawm tak a ni tih sawiin, India ram pum huapa inelnaa lawmman lak phak pawh thil harsa tak a nih laia khawvel huapa gold medal la phak phei chu tih namai lo tak a ni tih a sawi a ni. Minister chuan Lalfakmawii chu Mizoram leh India tihmingtha tu a ni tih sawiin, infiammite tan sawrkarin a tih theih apiang tlanchhe lovin a ti zel dawn niin a sawi a, hlawhtling tur chuan midangte aia tumruh leh taima nih a ngai tih hre turin infiammite a fuih a ni. Lalfakmawii Ralte hian kum 2013-2014 National School Games-ah Gold a la a, North East Games 2014 leh 2016 ah Gold bawk lain, 1st Elite Women National Championship 2016-ah Gold Medal a lo la tawh bawk a ni. Lalfakmawii Ralte hian 81+kg category-ah khelin champion thei tur hian Russian boxer 3-2 a hnehin Ukraine mi 5-0-in a hneh bawk. Lalfakmawii Ralte chawimawina puala inkhawm buatsaih hi Sports Secretary Pu H.L.Rochungnunga’n a kaihruai a, Mizoram Boxing Association aiawhin Vice President Pu F.Lalnienga’n thu a sawi a ni.