Agriculture Minister Pu C Lalrinsanga’n Mizoram chhunga leilet nei, an mi chhawr hnamdangte an haw avanga lei let thei lote sorkar-in a leh sak dawn tih a sawi.

0
110
views

Covid 19 vanga Kolasib district chhunga leilet neitute harsatna tawh enfiah hian Pu C. Lalrinsanga hovin Agri Development Board member ten Kolasib, Bilkhawthlir, Bairabi leh Bukpui tlangdung te Nilaini atang khan an fangkual a, leilet neitute zingah hnathawktu an chhawr hnamdang an haw vek avanga leilet thei lo engemawzat an lo awm a, helai chhehvel-a Custom Hiring Centres awm mekte hmang tangkaiin sorkarin tractor a lo pek tawh 5 te chu heng leilet neitute pui tur hian Minister hian a vailiam a ni. District Agriculture Officer, Kolasib tarlan danin tun dinhmunah hetiang harsatna tawk mek hi chhungkaw 123 an awm a, an leilet zau zawng belhkhawm chu hactare 151 vel a ni.

Agriculture Minister Pu C Lalrinsanga hian Covid-19 hrileng chuan ei leh bara intodelh duhna mipui rilruah a tuh thar tih a sawi a, leilet zau tha tak neitute pawh, anmahni leileta a hlawkna teltu ni tura hma la thar turin a chah a ni.

Kolasib District ramri depa leilet tam tak hi hnamdangten an enkawl deuh vek thin a ni.

Serlui bialtu MLA Pu Lalrinsanga Ralte chuan Bilkhawthlira leilet neitute harsatna sukiang tura Sorkar hmalakna chu lawmawm a tih thu a sawi a, loneitute chu lawmthu sawi nana buh leh bal tam tak thar chhuah tum turin a chah a ni.