Aizawl District Road Safety committee chu an Chairman Bawrhsap Dr A.Mathumma hovin a pisaah an thukhawm. Bawrhsap chuan, Khawpui chhung lirthei khalhtute zingah awmze nei lova motor horn hmang an awm lo chu state dang tan entawntlak a tih thu leh lirthei chetsualna tlahniam chu district road safety hmalakna rahchhuah nia a hriat thu a sawi a. District Road Safety Action Plan siam mek chu peihfel thuai turin mawhphurtute a chah bawk. Sorkar kum kal meka Committee thurel bawhzui dan sawiin Aizawl Traffic SP Pu C Lalthanmawia chuan, nikum Christmas vuakvet chhungin khawpui chhungah lirtheia chetsualna report a awm loh thu te, nikum chhungin lirthei chetsualna avanga thi 26 an awm leh heihi kum dang nena khaikhinin chuan a tlem hle tih te a sawilang a. Meeting chuan, Khawpui chhung hmun pawimawh zualah CCTV 7 dah belh nise an ti a, Rangvamual kawng dung, Tuirial dumping ground chhehvel kawng leh World Bank kawng thenkhat te chu lirthei chetsual tamna hmuna puan an rawt bakah heng hmunah te hian lirthei chesualna a tlem theih nan a tul anga hmalak an rel bawk.
